Lamizik Lalwizyan pou in nouvo Jénérasyon
Dan sidwès Lalwizyan, in jènn nonm sèy édjiké in nouvo jénérasyon apré lamizik ki mark réjyon-la. Israel Chiasson, konni kom Zydeco Izreal dan médya sosyal, té grandi tou sô lavi dan laparwas Lafayèt ensèrklé par lakiltir kréyol ki té transmèt par sô famiy é dòt mizisiyn. En oktòb 2024, li té donné lavi a sô kompt Instagram é té prenn rékordé dê mizisyin lokal ki té pa jish kréyol mé osi kadjin. Li té gin in lobjèktif: apren dirèk apré moun-çayé ki té viv listwa é partajé yê listwa avèk in pli gran piblik, in nouvo jénérasyon.
Pou Israel, lakiltir çé pa kashé mé listwa, yé pa byin aksèsib pou tou moun. Dapré li, listwa-yé byin konsèrvé endan liv, zarshiv, é tradisyon oral, mé çé laksèsibilité ki toujou dan kèstyon. Kan-minm, Isreal sèy rempli trou-çila é donné laklé a jénérasyon-çila. Li di nou, “Mo té apèrswa jènn moun ki swiv mò çé jolimen intérésé kan mo partaj dê listwa pou prémyé vyolonis, lakòrdéyonis, é mizisyin kréyol. Plizyé dan yé té grandi kouté Nouvo Zydeko, é pou zen, çé tou yé konné.” Pou li, çé impòrtan pou konté é partajé listwa pou moun konné listwa en plènn.
Zydeko té shanjé dépi sô nésans. Dan pasé, mizisyin té sèrvi in lakòrdéyon, in frotwar, é in tambou kom Anderson Moss, mé Israel di jòrdi çé pa parèy. Mizisyin, y’ap intégré autotune, sintétizè, 808, é dòt linflwens modèrn. Pourtan, jen lamizik-çila rès ènn dan plizyé vyé tradisyon lamizik dan Zétazini ki éné dan bal lamézon-yé pendan dê lanné 1800. Pou kontinwé tradisyon-çila, Israel té komensé in jam zydeko koté NUNU dan Lajonksyon, in plas éyou sô paren té koutim méné li kom piti. Dapré li, “Rasemblé-çiyé impòrtan paske yé donn dê zopurtunité pou tou mizisyin, nimpòt ki laj é nivo pou rasemblé, apren apré ènn-a-lòt, é tchin nô tradisyon vivan.” In lopinyon li partaj avèk dòt moun kom Colby Angelle ki mèn Latab Kréyol é Lala dan Lafayèt.
Israel p’olé jish konsèrvé lamizik: l’olé osi konsèrvé langaj-la dan lamizik. In tendans n’ap wa avèk dòt mizisyin kom Corey Ledet é Jermaine from the South. Li di nou, “Ékan mo komens rékordé mochin lamizik, m’olé konsèrvé langaj-la dan shak shanson, onoré mizisyin-yé ki té vini avan nou, é édé moun endan é déyòr Lalwizyan pou trouvé in kompreni pli fon a nô lakiltir é listwa.” Résenmen, li édé komensé in nouvo bann pélé Le Nouveau Zydeco avèk Brayden Janice. Ensenm, group-la sèy rékréyé é sélébré son ki té fé léko dan tou lamézon atravèr disid Lalwizyan dépi dê lanné 1800 é 1900.
Alòrs pou Israel, sô travay pa fini. L’olé kontinwé toushé nouvo moun é aksédé in pli gran piblik pou partajé é konté listwa a nô lakiltir pou li sré konsèrvé é pou li kontini progrèsé dan lavnir. Pou swiv tou li fé, abonné a sô Instagram é Facebook @zydecoizrealofficial é sô Tiktok @zydeco.izreal.
