Jelly Roll Morton: in Kourt Pòrtré
Pou in ta admirè a Jazz, Jelly Roll Morton (Joseph Ferdinand Lamothe) çé pa in nom yé pa ka rékonné, mé çé sô listwa ki souven tomb dan lombraj. In listwa, dokimentaris é fotograf dokimentè, Elroy “EJ” Johnson té engajé pou konté. Orijinalmen éné a Dallas, Elroy té èlvé dan plizyé léta kom Tèksas, Oklahoma, é Minnisota mé li ka trouvé sô rasinn dan Lalwizyan (éspésyalmen dan parwas Nakitòsh). Pasyoné par lar konté listwa, li swèt mèt dan limyè listwa a moun marjinalizé é kominoté nwa-la, li wa sô travay kom in manyè pou konèkté ak sochin rasinn é pou enkourajé moun konsèrvé é apren listwa-çiyé.
Li di nou, “Mo té fasiné par listwa a Jelly Roll paske li té in pyonné pou ça ki té vini ènn dan pli gran jen lamizik dan moun-la, jazz.” Jelly Roll, in nonm èlvé dan in famiy katolik tradisyonèl envil, té fé fas in débatmen, sô lamou pou lamizik é légliz katolik-la. Dapré Elroy, “Jelly Roll té spliké dan sochin paròl, moun té prenn piano pou in listrinmen pli féminin a lépòk.” Alòrs, çé in listwa ki asé komin pou mizisyin nwa-yé, sirtou çayé ki jwé dan légliz. É çé listwa-çila é sô frékans ki té inspiré dokimentaris-la.
Elroy Johnson é Carly Leday apé gaddé in limaj tandi yé film
Lá, kom tou projé, li té komensé ak in lidé ki té kapab toushé pa jish lidentité mé osi réalité a lavil é lamizik. Elroy é sô lékip té gin jolimen étidjé lidentité a la Nouvèl-òléan é lamizik jazz a sô lépòk. In tash posib ak laksé a Mizé Storyville é lintèrvu a Jelly Roll. Elroy kont nou, “Nou té fé in ta résèrsh, ça inkli kouté lintèrvu a Jelly Roll Morton vèk Alan Lomax dan zanné 1930, don in parti endan pòrtré-la.”
Chris Charles kom jènn Jelly Roll Morton
Dokimentaris-la don krédi a sô lékip. In lékip ki tou lokal a Lalwizyan. Moun kom Carly Leday, prodiktè kréyativ, ki édé shèrshé pou talen é ki té dékouvri Chris Charles é sô frè Malique Ward. Dapré dokimentaris-la, “Ça té prenn lontem pou trouvé in distribisyon ki té kaptiré laprens é sensasyon a Jelly Roll Morton.” Pourtan, çé té prémyé ròl pou Chris ki té jwé in jènn Jelly Roll ak sô frè Malique ki té prenn ròl a vyé Jelly Roll-la. In momen Elroy té déki kom ikonik é ki té minm méné in zafè spésiyal pendan yé t’ap filmé projé-la.
Langaj kréyol-la té osi gin sô plas endan pòrtré. Elroy fé nou kompren, “Pou in granmær kréyol éné envil dan 19yèm syèk, langaj-la té sré sentral dan sô lavi, kom li té pou in ta moun envil.” Dan pòrtré, granmær-la ki té jwé par Lyttany Whitley, natif a Lafayèt, çé biling. Ak in lo sô linn en nanglé, piblik ka tendé li plédé Bondjé dan nô langaj kréyol.
Lyttany Whiltey kom Granmær apé lir bib-la
Pou Elroy “EJ” Johnson é sô lékip travay-la pa fini. Yé plan mèt dan limyè dòt pèrsonnaj nwa ki té marké nô listwa pou don in reprézentasyon vizyèl a lavi a kékin é in momen klé ki té édé fòrmé sô léritaj. Yé swèt réalizé plis kourt pòrtré ki anim kominoté-la apren pou moun-çiyé.
“Jelly Roll Morton” çé astè disponib dan Instagram, Facebook, é Tiktok. Vou ka osi gété li koté lapaj @Thedirector_ej é Fordham Stories. Li sré disponib dan Youtube banbay.
