In Siksé Kréyol: Jouné Lakiltir Kréyol
Le 7 jwin, dan Lafayèt, yé té sélébré Jouné Lakiltir Kréyol koté Vèrmilyonvil. In zévénmen ki té renn lomaj a lakiltir kréyol ki toujou prézen dan léta Lalwizyan. Zévénmen-çila té rasemblé dê mizisyin, kizinyèr, réalizatè, é pòrtè lakiltir pou édjiké moun endan é déyòr kominoté kréyol-la. Lanné-çila, zévénmen-la té wa in lògmentasyon dan kantité vizitè avèk 1,225 vizitè komparé a lanné pasé ki té sèlmen wa 885 moun en tou. In délanm moun Vèrmilyonvil té jamé wa avan pou in zévénmen.
Jouné Lakiltir Kréyol té annim moun de partou, nwa, blan, kréyol, é non-kréyol avèk dê vendè, ènn ajoutmen Colby Martin, mannéjèz a planifikasyon é lédjikasyon, té apèrswa kom in trou dan programasyon-la. Kèk lorganizasyon té minm parèt kom NOLA Zydecofest, Chinbo Inc., é Holy Family Catholic School. Éyou vizitè té kapab apren apré ça shak group ofri.
Pou Clif St. Laurent, préziden a Chinbo Inc., zévénmen-la té “lakilchir kréyòl” avèk dê lafigi ki té fasil pou rékonné. Ènn dan yé té Lauren Richard, aktivist kiltiryèl, ki té démontré sô talen dan lakizinn avèk sô makshou mayi (in manjé klasik dan in lamézon kréyol). Famiy Catalon té minm akòrdé Pri Catalon-la koté in vayan memb a nô kominoté, Dr. Ernest W. Kinchen Jr. ki té dédyé sô lavi a présèrvasyon lakiltir kréyol é çé in défensè drwa sivil.
Lauren Richard dan mitan, sô kouzinn Kaya Jones a ladrwat, é Ms. Pat a gòsh
In nòt laspé impòrtan a nô lakiltir çé langaj nou parl. Pendan zévénmen-la moun té gin lashans tendé é parlé kréyol. Inavé latab kréyol ki té méné par Herbert Wiltz, memb a C.R.E.O.L.E. Inc., éyou moun té kapab apren é pratiké langaj-la. Yé té gin latab shantan méné par Jolene Adam ki té édé introdwi é fé moun raplé dê shanson kréyol. En plis, Clif St. Laurent té raflé dê pri Chinbo Inc. tou dan langaj kréyol. Li di, “ mo té réfuzé parlé mérikin si mo viní konnin k’ènn moun té konné parlé. Mo viní konné ça par apé parlé tou moun mo wá swa dan fransé swa kouri-vini. Mo minm kèstyonnin in boug en kréyòl.”
Shelby Thibeaux é Drake Leblanc
Apé séyé konèkté lakiltir kréyol a sidlès é sidwès Lalwizyan, Vèrmilyonvil té jouté dê aktivité ke boukou moun té jamé viv avan. Dapré Colby Martin, çé té prémyé fwa-la dan listwa a zévénmen yé té gin in mini-promnad shval gidé par Drake Leblanc é Shelby Thibeaux ki té kouri atravèr vilaj-la ishka yé té bouté lamézon lékòl éyou Footwork, in pòrtré par Drake Leblanc, té projété. In nòt ajoutmen a progamasyon té 2èm linn-la ki kité moun partisipé dan ènn zaspé a lidentité kréyol ki pa sélébré dan sidwès Lalwizyan.
Minm si répons a zévénmen té majoritèmen positiv, kèk moun té wa dê mòyær pou mélyoré li. Prémyé mòyær çé pou ogmenté plis reprézentasyon a kominoté kréyol. Clif St. Laurent pens ke langaj-la kapab gin in pli gran ròl. Çé pa pou di ke zaspé-çiyé té pa prézen mé ina pariyin ki tro kan ça konsèrn no lakiltir.
