Çé tem pou in nouvo drapo?
Ça fé 39 nan dépi kominoté kréyol-la té wa sochin drapo kréyé par Pete Bergeron é adopté par C.R.E.O.L.E. Inc en 1995. Dépi sô kréyasyon, drapo-la té payé tou partou dan kominoté dépi la Nouvèl-Òléan ishka Kalifòrni. Pourtan, in nouvo jénérasyon ap fé ni ènn ni dé pou piké in nòt drapo. Jordi, in Afro-kréyol fyèr a léritaj, té kréyé in nouvo drapo pou reprézenté in kominoté spésifik. Li di, “Mo limn drapo orijinal a Pete Bergeron…mé mo té senti nésèsité fabriké kishòj ki reprézent nô léritaj afrikin spésifikmen.”
Alex Trapps-Chabala, Jeffery Darensbourg, Daniele Simpson, é Julien Gills koté laplas Kongo
Nésèsité-çila té trouvé kréyé ça li pèl drapo Afro-kréyol-la. Ak sô koulè rouj, blan, jònn, é vèr. Li pòrt in magnolya dan mitan ki reprézent in lyin fon ak spiritiyalité sent afrikin ak sô fèy ki pwint dan tou dirèksyon pou fòrmé in lakrwa pou rélijyon katolik-la. Enba li gin dé mashèt jònn ki viz-a-vi ènn-a-lòt pou renn lomaj a zen ki té batayé pou libéré yé-minm é zen ki té ouvri in shmin pou jénérasyon-yé apré, ak in fraz ki rès enho tou ak paròl-yé “Pou Nô Zansèt.” Jordi déklar, “Mo té pèrsonèlmen senti nou té bezwin kishòj ki sé réflèkté é onoré nô vyé paren tandi l’ap toujou konté nô listwa komplèks.”
Jordi swèt pa remplasé drapo orijinal-la. Enfèt, li di nou li vo-myé gin plizyé drapo léritaj. Li pens drapo-çila kapab enkourajé fyèrté etni endan popilasyon nwa-la. Li di, “Ap enkourajé fyèrté etni par lar sé définitivmen kabalé jènn jénérasyon nwa-yé pou dèt fyèr yê lidentité é mo swèt mô drapo pé fé parti ça.” Lá, li konfès kèk moun pens çé intil pou di Afro-Kréyol dan plas kréyol afòrs sô konotasyon, mé l’olé fé moun raplé nô kréyolité pa jish konèkté par nô léritaj afrikin mé par tou moun ki té kontribiyé a lakiltir kréyol Lalwizyan. Pou Jordi, ça donn moun lèspas pou identifyé komen y’olé endan nô kominoté. Mé li répèt, “Pou drapo-la, mo trouv li jolimen impòrtan pou proklamé li kom in simbòl pou moun Afro-kréyol afòrs li té fé pou nou é par nou.”
Sô drapo, yé fé par kommand. Pou kommandé in drapo, vou kapab kontaké li koté instagram (@boudin_bandit) ou Tiktok (@boudinbandit) ou par lalmèk: Kreyolculture@gmail.com.
