Zydeko dan disan: Corey ledet
Paròl pou konné
Kèstyon-yé
1. Corey Ledet té éné dan ki léta?
2. Ki çé té sô prémyé linstrimen?
3. Fini fraz-la:
Sô kouzin-yé té ______ lamizik ak Ike é Tina Turner.
4. Kofè li té fé in plak en kréyol?
Li té fé in plak pou fé li apren langaj-la é fé sô par pou tchinbo li.
Éné dan Houston é èlvé koté Missouri City dan Tèksas, Corey Ledet té vini in star zydeko dan Lalwizyan mé pou li lamizik té toujou dan sô disan. Corey trouv sô rasinn dan in ti vilaj ça yé pèl Pak, Lalwizyan dan parwas Sin-Martin. Li té pa prémyé moun dan lafamiy pou jwé lamizik; sô gran-granpær Gabriel Ledet té in mizisyin Jazz ki té jwé labas pou Bunk Johnson é lafamiy Potiers, sô kouzin-yé. Yé té jwé avèk Ike é Tina Turner, B.B King, Louis Armstrong, é sô kouzinn é mizisyin zydeko Donna Angelle. Alòrs, çé té sô granpær Bucannan Ledet, ki té jwé avèk Clifton Chenier, Fernest Arceneaux é Rockin Dupsie, ki té byin inspiré li.
Kom sô pær, granpær, nonk, é kouzin, tambou té sô prémyé linstrimen. A laj 13 zan çé kan li té prémyé engajé pou bat tambou pou Wilbert Thibodeaux é Zydeco Rascals. Mé çé té sô kouzin Leon Sam, memb a bann zydeko Sam Bros é bazé dan Houston, ki montré li komen manipilé lakòrdéyon.
Abin, çé té pa jish lamizik ki té intérésé li. Kom plizyé moun dan kominoté kréyol-la, li té tendé langaj kréyol-la alentou li mé té jamé gin lashans parlé li. Pou shanjé ça, li té prodwi sô prémyé plak tou en kréyol “Médikamen.” Li di, “Mo désidé fé in plak tou dan Kouri-Vini pou fé mò apren langaj-la… Astè li [mô pær] konten m’apé apren nô langaj é apé fé mô par pou tchinbo li.”
Mé dan komensmen moun, yé té pa pensé ça t’alé dèt in bon lidé afòrs nanglé té prenn plas kréyol dan zydeko avèk in jènn jénérasyon ki kout pa boukou Clifton Chenier, Beau Jacque, é Boozoo. Pourtan, Corey té vansé é té lashé “Médikamen” en 2023. Shanson-yé kom “Alon Kouri Laba”, “Médikamen”, é “Two-Step a Ben Guiné” té fé moun grouyé. Pou Corey, li té wa in bon résèpsyon. Dapré li, astè ina dòt lartis ki motivé intégré langaj dan yê lamizik itou. Li rékonné li kom in “gran comeback pou nô moun kréyol,” kèkshòj ki kapab édé rafòrsi nô langaj kréyol.
“Médikamen” té pa lafin pou shantè-la. Le 2 jwin, li annonsé l’ap prodwi in plak blues pélé “Apé Shanté Lê Blues,” in nòt plak tou dan langaj kouri-vini-la. In plak dan ki nou kapab spéré dékouvri dê blues atravèr sô zyé-yé. Lartis déklaré, “mo gin in ta dê blues en mò.” Alòrs, pou kominoté-la, plak-çila çé kèkshòj nou sé p’olé raté.
