R&B en kréyol: A.ZA
Lamizik kréyol ap viv in rénésans kom jamé wa avan. Mizisyin kom Jermaine du sud, Kruella, é Babydoll Countess ap kréyé in nòt lamansh. Aliza Ariza, ki shant sou nom A.ZA, jwènn bann mizisyin-çiyé ak sô prémyé shanson “Pa Fé Kom Si.”
Éné dan lopital Huey P. Long koté Pinevil, Lalwizyan, Aliza té grandi ent Batonrouj é Marksvil éyou li sré batizé dan in rish lakiltir mizikal. Ent rap, zydeko, blues, é bawns ki fléri dan léta, mé çé té R&B ki té mèt in mélodi a sô paròl. Inspiré par Aaliyah é Jhené Aiko, li t’olé méné lénerji-çila koté kominoté kréyol-la. Li di nouzòt, “Mo t’olé fé lamizik dan R&B parské li donné mò in mòyaer pou spliké ça k’apé pasé dan mô lavi.”
Li sèrv lamizik kom in mòyær pou senti endan langaj-la. Li konfès, “Mo krò si nou ka ri, jwé, brayé, é jish senti tou ça dan kouri-vini, çé byin pou révitalizasyon langaj-la.” Aliza olé langaj-la vini in parti nòrmal a lavi pou moun lalwizyan kom li té pou sô vyé paren-yé. Mé osi, l’olé moun konné langaj-la ka évolwé akoté lavi modèrn jou jòrdi. Çé pa in vyé zafè ki pri dan pasé.
Aliza pens mizisyin kréyoloparl-yé kapab pèrsé kominoté intèrnasyonal-la. Nou ja wa mizisyin kom Cédric Watson ki té fé konsè koté Larényon, Ayiti, Lafrans, é Kanada. Li té méné nô lamizik tradisyonèl pli lwin pasé nô frontyè kom mizisyin avan li, mé Aliza swèt simenté in lamansh pou mizisyin lalwizyan ki shant pa jish dan langaj kréyol, mé ki tourn lamizik mwins tradisyonèl.
Malgré l’ap nargé nou ak sô prémyé shanson “Pa Fé Kom Si”, li kité nou konné l’ap travay pou fini in plak ak 5-6 shanson. Kouté sô lamizik koté Apple Music, Spotify, é Youtube.
