In révèy: Jermaine From The South
Minm avan li té lashé sô plak, Jermaine from the South té ramasé in gran piblik tandi li té nargé nou avèk dê ti klip. Éné dan Lak-Sharl, apré li té fé 8 nan sô famiy té délojé koté lavil kapital éyou li t’alé rèsté pou balans sô lavi lékòl. Dan Batonrouj, in sent pou lamizik blues dan léta, Jermaine té dévlopé ènn aprésyasyon pou tou jen lamizik. Li di “kan mo té piti, mo té konné kouté plin lamizik Rock….mé kan mo rentré névyèm lanné dan lékòl, mo komensé kouté plin hip-hop konm Madlib é J Dilla, épi lamizik ki sòr diféren péyi.”
Alòrs, kan li té mandé apré sô linspirasyon mizikal, li té afirmé çé té pa jish lamizik ki té inspiré li. Pou Jermaine linspirasyon çé tou partou “dan liv, vyé pòrtré, poézi”, é dan kozé ent li é sô zami. Kèkshòj li di “t’a trouvé” si to kout byin sô lamizik. Jermaine rékonné osi in linflwens trouvé déyòr frontiyè-yé a Lalwizyan. “Jou jòrdi, m’ap kouté in lo lamizik Kréyòl ki sòr Martinik, Gwadloup, Ayiti, é lòt péyi-yé konm Malavoi, Robert Loyson, Mizik Mizik, Ti-Émile é tou ça.” Kom ça ki té rivé dan pasé, Jermaine ap konèkté avèk in kréyolité ki plis pasé Lalwizyan minm. Byin klèr kan li mété in léshantiyon shanson “Ti Milo” par Eugène Mona dan prémyé shanson a sô plak “Bal Tanmbou.”
Çé pa jish linflwens lamizik ki èd li konèkt avèk pan-kréyolité-çila, çé osi komen li té kapab liyé nô pozisyon endan Lalwizyan avèk çila ki ègzist dan ti Zantiy. Le 7 jwin, li té pibliké in ti klip dan sô kompt instagram devan in mannifaktir shimik dan in klo dikann tandi li shanté “Djiyamon.” Éyou li shant, “Mé çé pa ish nou é yê bòt en nou kou…Yé té pwazonnin Madinina é Karukéra” (ansyin nom matinik é gwadloup). In vèr ki çé intrinsikmen politik mé pou shantè-la minm shanté en kréyol çé politik. Dapré Jermaine, “toukishòj ki pa ‘Mérikin’, çé politik. É rèlmen mo wa kilti Kréyòl kont kilti Mérikin, yé marsh pa enho minm shémin-la.” In lidé li partaj avèk Debbie Clifton, ékrivin é poèt kréyol, ki li sit dan sô prémyé shanson,” Mé mo las résté la san bayé yé traka, Fo nou kit yé konné nouzòt pa linmé yé, Baré yê shémin, trakasé yé plin, garòshé yê mòyèr a vilin mérikin.”
Lá, pou li çé pa jish lapolitik. L’apé fé lamizik pou fé moun “grouyé yê dèryè” pou bliyé dê traka lavi. Mé zafè pli impòrtan-la pou lartis çé ke moun lalwizyan rékonné yé kapab sèrvi langaj kom in zouti pou èspliké yé-minm, fé lar, é minm plis. Li déklaré, “M’olé moun wa rishès nou langaj paské li çé in vré trézòr ki nou gin…Nou bézon protéjé li, payé li, é bati li pou jénérasyon-yé ki vyin é mo kwa n’ap fé in bon djòb!”
Érézmen, nou va pa gin pou spéré tro lontem pou in nòt shòj. “Talè talè! Pétèt m’a gin lamizik nèf dan aout, mé m’olé fé plin lòt zafè-yé en kréyòl anvan ça.” Pou Jermaine çé jish komensmen-la!
