Parabòl a Semè
4.5/5⭐
Mo détest siyens fiksyon. Mo pens li çé in jen ki kontent li. Mo té lir in gran variyété a siyens fiksyon, é pou mwin, yé té pròsh tou pla. Ina yink dé kalité siyens fiksyon mo linm; lèspas, lapolitik é oto-dékstriksyon. Mo sé di ça prenn in ta pou fé mwin olé lir in liv siyens fiksyon, é minm in brin plis pou vansé, é in léfòr impòrtan pou fini li é linmé li. Çé kom ça mo té konné Parabòl a Semè té in vayan liv. Li té pa asé pou mwin pou jish lir li - mo té gin kontinwé. Li té dir pou mwin pou lashé liv-la.
Yé gin ti zafè ki fé Parabòl senti pli vré pasé dòt liv: Lauren k’ap kou ashté pou tampon-yé dan in boutik, Keith, dinamik famiy ki fonksyon dan in manyè disfonksyonèl, komen nasyon ègzist atravèr liv-la. Zafè-çiyé fé li senti enrasiné. Li impòrtan noté moun-la a Butler dan Parabòl pa san nasyon; nasyon ègzist otan li ègzist dan moun jòrdi. Ina zaspé a liv ki, byin sir, fantastik - gran ségré a Lauren, tribu-yé ki adik ladròg ak plin arsonis, vwayaj dan lèspas a gran éshèl - mé li détash pa sô lèktèr lwin moun réyèl-la ki Butler té kréyé. Parabòl plant in grènaj o fon lidé afòrs sô faktòr réyalis. Çé fasil pou wa komen nou ka bouté in moun kom çila dan Parabòla Semè dan déotrwa zanné, é dan plizyé manyè - nou ja lá.
Mésaj a Parabòl (omwins ça mo pens li yê) çé klèr: majiné in démin ki myé pasé réalité jòrdi. Liv-la fé klèr dan prémyé katòrz shapit lavi pa difisil, é l’a pétèt vini pli pir - mé ça çé pa tou lavi yê.
Naratè-la, Lauren Olamina ki gin 15 zan, ki gin latèt dir é ki vèr dan plizyé manyè. Li vré. Nou wa moun-la par sô zyé. Listwa ariv dan mitan zanné 2020, Parabòl a Semè boulòt dan Kalifòrni ravajé par klima-la dan sochin kominoté ensèrklé k’ap krazé. Zafè-la ki renn Parabòl a Semè byin intérésan çé pa jish moun-la ki Butler té établi ou minm sô pèrsonnaj-yé byin ékri ak yê défo, mé paralèl-la ent liv é nô moun. Lauren çé in pèrsonnaj ki senti vré, dan ki vou ka wa vou. Kèstyon-yé ki li mand apré sô kominoté, krétchyin é sô famiy çé kèstyon mo souven mand mo-minm. Dépi Lauren, nou gin Earthseed. Dépi Earthseed ariv sitasyon-la ki fé léko atravèr Parabòl — “Bondjé çé shanjmen.”
Li difisil pou byin dékri Earthseed. Çé in rélijyon mé pa toutafé. Ina sitan pasaj a Earthseed ki byin profonn é dévlopé atravèr liv-la. Earthseed pli konsèrné ak prinsip-yé pou gidé lavi dan plas in bondjé pou vanté. In zafè ki mo pens renn Earthseed spésiyal çé li pa réyalis; li donn lèspwa. Çé sèl parti dan tou liv-la ki iréyalis. Ça fé twa sòrti dan tourmen é soufrans asé byin pou konné ina in lavnir si to ka majiné ènn pou twa. Yé gin réalité-yé ki pliyé dan pasaj, mé lidé a Earthseed konsèrn kishòj ki dépas tô réalité-yé: li konsèrn kréyasyon a moun-la nou rèv é réfizé aksèpté moun dan ki nou viv drèt-lá.
Laventir a Lauren çé ènn ak traka é tribilasyon. Li fé fas ak gran pèrt: sô lamézon, sô zami é famiy, é lavi kom li konné li. Shòj-la ki Lauren pèrd pa çé li-minm - sô lèspri. Li in pèrsonaj ki fé moun réfléshi. Lauren, kom in pèrsonaj, gin sô traka. Li ékri dan in manyè ki paré ça ki kékin majinn in jènn moun kinz an smat plito ça k’in jènn moun kinz an saj yê. Dêfwa, ça senti kom li té pa tou dévlopé. Ça tir pariyin dan liv-la. É ça fé pa Lauren senti mwins vré. Çé tris Butler té plan trwa liv pou séri Parabòl-la mé té mouri avan li té ka ékri trwaziyèm-la. Si to sé linmé lir plis apré listwa a Lauren, Parabòl a Talen boulòt minm pli lwin dan lavnir é swiv in gran moun Lauren. Apé swiv Lauren pendan sô laventir té fé mwin réfléshi. Mo pa ka spéré kontinwé lir sô laventir dan Parabòl aTalen. Liv-çila vo lapènn lir.
Proshin lèktir: Things Fall Apart par Chinua Achebe.
