Profèt-la par Khalil Gibran
5/5⭐
Paròl pou konné
Kèstyon-yé
1. Dapré Devon, ki moun sé lir liv-çila?
2. Dapré Devon, ça ça Khalil Gibran fé ak lavi?
Mô prémyé introdiksyon a Khalil Gibran té sir Boondocks “Wingmen” (sézon 1, lépizod 13), kan Huey résité,“Tô doulè çé léklatmen a kòkiy ki frèm tô disèrnmen. Çé lak anmè ki doktè endan twa détoun tô lashmen. Insi, fé konfyans a doktè-la, é bwa sô rémèd en silens é trankilité. ”Mô sèrvèl kan mo té gin 11 zan té prenn Khalil Gibran pou in révolisyonè nwa (pou in rézon ou in nòt). Mo té pa gin lidé mo sé dékouvri in nouvo shmin a Khalil Gibran in désenni pli tar- pa kom pèrsèpsyon mo té fé pou li, mé kom in lartis, poèt, é lotè liban-mérikin. Pendan mo t’ap lir Profèt-la, mo trouvé krwazé “Sitasyon Boondocks-la,” é li shanjé mô pèrsèpsyon a programm-la é liv-la. Çé ça ki intérèsan dan lèkti; tô lèkspiryans-yé mélyor tô disèrnmen. Çé ça Profèt-la fé pli byin, é kofè liv-çila té rèsté pou plis 100 nan apré sô sòrti: li grandi ak twa. Çé gid ésensyèl a Profèt-la pou viv tô lavi, ou byin çé in liv plin platitid-yé ki pa tashé a vré lavi? Pou mwin, çé kèkpar en mitan. Profèt-la çé ça to prenn apré li. Swa to linm li ou to détest li, li ka donné twa kishòj to ka prenn. Mo propoz liv-çila a nimpòt ki moun ki vini ak in lèspri ouvèr. Mo kit twa ak (ènn dan) mô sitasyon favori sir lajwa é shagrin: “Mé mo di vou, yé inséparab. Ensenm yé vyin, é kan ènn asi tou sèl ak vou a latab, raplé lòt dròmi endan lit ak vou.”
Mo té ja lir sèz paj a liv-la kan mô kolèg mandé, “çé pa tro prétensyé pou twa?” ak tou sévérité dan sô lavwa. Mo té sirpren; mo té pa tro lir pou fòrmé in bon lopinyon, é mo té linmé ça mo té lir. Mo té tchin kommentè-çála enariyè mô lidé pendan mô laventchir ak liv-çila, mo t’apé swèté konné ça ki té kabalé sô lidé. Profèt-la té, tem zen tem, semblé gòsh…pa réalis. Mé mo pens ça çé té lajwa a liv-la: rédwi komplèksité a lavi tou lê jou pou renn li pli simp. Gibran té prenn konsèp komplèks — lamou, lajwa, mariyaj, lamòr — é renn yé pli dirèk, kom si m’ap intèrprété yé dan in fòrm ki pli pir san pèrvèrsyon a komplèksité moun. Mo kapab wa komen ça kapab pousé moun. Lavi, li komplèks; çé malédiksyon a lègzistans moun, ça fé pou lir in liv ki iynor komplèksité-çayé, li inkyèté. Mé çé pa mal. Mo pens Khalil Gibran renn kompt komplèksité a lavi kan l’ap ékri é li désid yé pa impòrtan. Dan plizyé mòyær, ça çé ça ki lamou yê — apé wa in montañ traka tasé kont twa mé ap désidé kontinwé laventchir. Zafè-yé ki mo té linmé apré lékriti a Gibran té komen li té kapab mélé simplisité ak fantastik-la. Yé té gin pariyin ki té komifo, pourtan tou té komifo.
Orijinalmen pibliké en 1923 avan Gran Déprèsyon-la, Profèt-la té aji kom in sours a lèspwa pou sô piblik. Astè, pli pasé 103 zan apré li té lashé, ça té aji kom in kamrad. Çé in liv to mèn tou kèkpar é atravèr lavi. Kan zafè vini difisil, to ka apiyé enho sô zépòl pou édé gidé twa lwin ténèb. É kan zafè, yé klèr, to ka kompté en li pou partajé lajwa. Liv-çila çé ça to fé li. Ça ka dèt tô limyè, ou ça ka dèt tô zami; nimpòt ki to désid, liv-çila isit pou gran é ti momen a lavi. Profèt-la çé ènn dan liv pli popilyè a toultem — tradwi endan plis pasé 100 langaj, liv-çila té toushé koer a moun tou partou. Si ça isit té inspiré twa lir Profèt-la, mo envyé twa é laventchir to pròsh pou komensé. Si yé gin kèkshòj to sé prenn apré liv-çila, çé: Sèrvi li, kan to pas in tem difisil é bon tem. Sèrvi li.
