Mo devyin disid é mo gin kishòj pou di
Kouté nouzòt dan disid paske nou gin kishòj pou di é louvraj pou fé!
Mo senti gòsh apré léta a zafèr dan péyi-çila é m’a dégòrjé
Drèt-lá atravèr disid entiyé, nô pouvwa politik enba atak – dan gran jou, par sal de kour, dê léglisatir léta, é map kongré désiné dan kashèt pou asiré sèrtin lavòt jamé démont vré reprézentasyon. En minm tem, ina in kakofoni a lavwa enliñ k’ap pousé k’ap di moun nwa é marjinalizé dan disid pou dérasiné nô lavi é parti o dinòr – apé abandoné nô kominoté, nô listwa, nô lyin ak latè nô gran-paren é gran-gran-paren té batayé, sinyé, é dan plizyé momen péyé koutans iltim pou. Alon di lavérité: çé pa kishòj ki sé travayé pou nou, é m’a di vou kofè.
Moun té fé èkspré kréyé kriz-çila. Çila çé in sistèm k’ap fé ça li té sipozé fé.
Le 29 avril, 2026, Lakou Siprèmm té donné Lalwizyan v. Kalé– in désizyon 6-3 ki té bat disrik kongré majorité nwa dan Lalwizyan é té renn 2yèm Sèksyon a Voting Rights Act initil. Désizyon-la té shanjé standar pou défiyé diskriminasyon rasyal dan lavòt, astè plintif blijé prouvé yé té gin intendé diskriminé plito ké zéfé diskriminasyon – apé éliminé protèksyon ki té établi pendan déseni-yé.
Fon défens légal a NAACP-la té pélé li in dan latak pli sériyé kont drwa lavòt dépi kèk déseni. Jistis Elena Kagan pélé li in “démolisyon.” É kom kékin ki gin rasinn dan Lalwizyan, mo rékonné li kom in latak prèsonnèl.
Black Voters Matter, té di désizyon Kalé mèt 191 pozisyon léjislatir léta dan risk a léliminasyon, ak disrik majorité nwa ki ka posibmen wa in déklinn dépi 273 jiska 146 pozisyon – in pèrt a pròsh in démi a tou disrik majorité nwa dan disid.
Tèksas té gabari pou kombyin vit ça grouy. Nouvo map kongré té siblé sink pozisyon démokrat dan métro a Austin, Dallas, Houston, é Tèksas disid, fabriké pou kréyé in nòt disrik majorité répiblikin blan – dan tou abitan ispanik fé parti pli gran group démografik-la dan léta.
Wi, zen sé di disid-la tro shèr, tro enrasiné, çé in batay difisil. É wé, ça sra difisil. Mé dézarmé inilatéralmen pendan in lagrésyon politik flagran – apé bandoné réjyon-la ayou plipar nwa mérikin viv – çé kapitulasyon.
Nou té lá avan.
Dan komensmen dê zanné 1900, plizyé dan nô vyé paren té jwin Gran Migrasyon, apé soufri rasism, tromatism finansyè, é tèrorism sosyo-politik dan disid, apé swété baklé in méyœr lavil. É pourtan, parti o dinòr té pa fé diskriminasyon disparèt. Masak té swiv. Masak lès Sin-Loui a 1917. Lété rouj a 1919. Plizyé dòt. Délojé protèj pa nouzòt. Konstwi pouvwa protèj nou. Atravèr dê dèrnyé déseni Nwa Mérikin-yé bin ap rétouné dan disid apé fé parti in “Nouvo Gran Migrasyon,” akòz lopurtunité ékonomik, rasinn famiy, é in sens lèspas réklamé. Majorité moun nwa dan péyi-çila rès toujou dan disid – é ça çé lavantaj, si nou invèsti ladan.
Solisyon-la çé pou bati endan Disid, pa abandoné li.
Ina dê lidè isit-lá k’apé fé bon louvraj dan lorganizasyon kominoté é gouvernmen lokal, ki bin apé sonné lalarm pou in vré stratéji disid – in ki plin ak résours-yé pou konèkté, organizé, é prézenté dan lafòrs astè é dan lavnir. Çé in tou lê dé/é momen. Byin sir, nou bezwin chinbo progré dan “Kwin Amen” kotiyè é dan dinòr ayou n’ap fé progré; Épi nou gin pou pren kouraj dan plas ki pous nou. Lorganizasyon ki engajé pou jistis bezwin prézenté ak pyas, ak dê konférens, ak linfrastrikti – pa jish dê fraz. Ina moun dan kominoté-çilayé ki paré engajé é konstwi, mé yé jamé gin in lashèz a latab paske latab toujou mété kèkpar dòt.
Invèsti dan Disid çé pa aktivism. Çé bon lèspri.
Disid-la çé in ka ki pa gin asé finansmen – pa in ka pèrdi. Ga wa ça ki rivé kont laksé lavòt apré Shelby Country v. Holderen 2013— çé ça sou-invèstismen kout. Kan linfrastrikti a protèksyon çé démonté é pariyin çé bati pou remplasé li, pouvwa konsolid. Konsèyé politik-yé ki galop dê playbook normalizé dan yê lèspas sòv çé pa répons-la.
Apé shanjé dirèksyon dê fon lorganizasyon, rent konférens, é linfrastrikti politik endan kominoté disid-yé avan novemb 2026 çé in dan lavantaj ki gin linflwens nou ka fé drèt-lá – é nô méyœr lashans pou kasé sèrk. Wi, nou bezwin moun pou voté. É sistèm politik bezwin invèsti endan kominoté-yé pou montré yé ke yé soutini – fo pa fé bon dan kominoté kèk lasmènn avan lélèksyon é disparé apré rézilta lélèksyon. Nou mérit invèstismen soutini é vré é lidèship transfòrmasyonèl ki wa Disid kom in fondasyon, pa in ariyè-jonglmen.
Mo çé in nèg disid k’ap gété yé ship pouvwa politik a mô moun – é mo va pa jish rèsté dan mô pozisyon é gaddé ça. Avèk lélèksyon dan mitan manda en 2026 k’ap vini dardar, lotè a kriz-çila ap komté si nô fatig, nô divizsyon, nô labsens é yé ka raté mò é vou ak ça.
Alon rété mové moun par protéjé nô drwa lavòt é alon bati bon-la par invèsti isit-lá, organizé isit-lá, é enrasiné nou-minm isit. Mo p’alé donné yé ça y’ap komté si é vou sé pa fé ça non pli.
Kouri koté Hip Hop Caucus Respect My Vote! Platform é tiré in plan pou voté, organizé, é dèt prézen. Fo protéjé nô drwa lavòt.
Kouté nouzòt dan Disid paske nou gin kishòj pou di é louvraj pou fé!
Stephone Coward II
Stephone Coward II çé in stratéjis jistis ékonomik é aktivis finansyè ki travay koté intèrsèksyon a finans, jistis rasyal, é défens politik. Apé sèrvi sô dé déseni dan labank, li dirij dê kampagn é narrativ ki kabal moun ki pren désizyon pou grouyé larjen lwin lindistri ki fé mal é vèr solisyon kominoté ki bati bon-la, tandi édé dê shitrwayin sèrvi yê lavwa, lavòt, é larjen kom in zouti pou jistis
