Lèkspiryans Métrèsdékòl
Komensé kom in métrèsdékòl fransé en novenm té intérésan…kom plizyé nouvo métrèsdékòl, mo té gin in lidé vag a ki kalité lenvironmen mo té sé entré. Lékòl té parèt asé tchéfrout pou dèt sòv, zétidyan té semblé mòyèr poli, prinsipal té kom in gid alentou kampis. Sô sèl démand pou mwin té pou kontré piti ayou yé té paske yé té gin in sibsti jiska mwin épi ça té jish olé di in zafè pou in laklas fransé: tradiksyon google!
Toudminm, li té semblé asé fasil. É apar tou zafè kondwit é apé gin némésis é mank rèsponsibilité a lékòl té mété sou zépòl zétidyan, çé té in bon djòb. Malérézmen, in ta métrèsdékòl té gin lidé si yé té sèlmen gin pou montré, ça sré pli fasil, é piti-yé sé gin pli siksé.
Dèt in métrèsdékòl langaj étranjé çé mwins strèsan pasé prinsipal topik dan mòyær nou pa gin pou préparé nô piti-yé pou in tès o bout shak lanné. Çé libèrté é minm fatigan pou zétidyan-yé é métrèsdékòl yé-minm. Souventfwa, mo té gin piti ki di yé sé jamé alé Lafrans é ça vo pa lapènn fé yé prenn laklas…fònn.
Kan-minm, travayé dan in lékòl, to wa komen moun té raté piti-yé. Minm piti ki té marké pli smat té toujou trouvé tash kom lékriti difisil. Otan nô piti té sou nivo liv-la, é dévlopmen profèsyonal disrik té jish kom téori jété a métrès é té di métrès komen yé té gin pou vini disiplinnè dan yê laklas avan yé té livré mòtiriyal. In lo piti té jish pasé, é moun èspèr yé sé vini kishòj kom si yé té pa di indirèkmen (é kèkfwa dirèkmen) yé té pa vo tem yê mètdékòl.
Pou tchoulé in brin, kan mo té dan lysé, mo té alé ènn dan lékòl “méyœr-la” dan Lalwizyan é té gin pou fé in papyé résèrsh shak lanné. Nou t’ap lir liv plin-yé é in ta dan in sèmèst. Astè, ça senti tro lwin minm si çé té jish 4 zanné pasé mo té gradwé. Piti, yé pi ap lir liv-yé, y’ap lir “èkstré-yé,” akòz ça çé kirikilim astè-lá. Minm tandi m’ap préparé pou nouvo zan kom in métrèsdékòl nanglé, nou sa lir sèlmen èkstré liv…ki mové sèrvis. Dan in kriz litérè, nou p’ap aksèpté lashans pou renn piti pli réziliyen kont litimidasyon é kèkfwa langaj ki pa konnu ki rédwi valèr langaj. Si n’ap inkilké koté piti yé jish destiné prenn kèk “parti” a zafè plin, yé sé jamé trapé tou pòrtré. Yé sé jwènn in bann moun ki inyoran é fòr apré ça yé “konné,” ap kontribyé a nô lakiltir plin lidé ki pa komplèt, é potensyèl ki pòkò èksplwaté.
Nijah Viltz
Viltz çé in métrèsdékòl nanglé dan 4yèm liv ki obsédé ak The Hungry Catepillar aprézen. Li té gradwé LSU ak dé diplòm en fransé é litérè nanglé. Li pasyonné par konsèrvasyon lakiltir Lalwizyan é souchin sô bibliotèk piblik. Pendan tem lib, l’ap shakayé sô shyin malin é pintchiré.
