Shak lanné, bokou komminité kréyol otour moun-la sélébré yê Kréyolité pendan oktòb, Mwa Kréyol. Lalwizyàn, ki gin sochènn komminoté kréyol, mark okazyon-çila osit. Nouzòt envi plonjé dan litérati é lar vijwèl ki prézent Kréyolité é ça ki va avèk: Kréyolitid, lidentité, lakiltir, léspri, lenvironnmen, lar, lamizik, pèspèktiv, lèkspéryens, konnèksyon é dékonnèksyon, manjê, tradisyon-yé, fòlklòr, itou, itou, itou. É si no trouvé nou-minm dan in péyisaj plin fifolé — boul difé blé klè-yé plin mistè k’ap floté en lè, abitan dan sipriyè e maré Lalwizyàn — minm myé.

Révu Feux Follets-la invité lartis vijwèl-yé dan tou komminité kréyol otour moun-la pou soumèt ènn pòrtré ké n’a konsidéré pou kouvè niméro-la. Avèk vô soumisyon, voyé-nou vô pòrtré moun kout (maksimonm 100 paròl/mo) ekrí dan trwazyinm pèsonn dan vochènn langaj kréyol avèk sô tradiksyon en fransé (o zòt ka voyé in tèks yink en fransé). Pou çayé ki ékri en kouri-vini (kréyol Lalwizyàn): si to pa konné komen tradwi en fransé, nou sa konten pou fé tradiksyon-la si nou shwazi pibliké tô travay.

Détay pou soumèt lar vijwèl:

1. No aksèpté yink pòrtré-yé dan forma JPG ou PNG.

2. Pòrtré gin dèt dan hòt kalité: 300ppp (piksèl par pous). Sô tay pa ka pasé 2000p nimpòt ki koté é ça pa ka dèt pli gran ké 10MB (mégabit).

3. Dan in dokimen Word (no va pa aksépté lézòt forma), ékri détay pou tô soumisyon:

   1. Tô nom plin é tô nom profèsyonnèl (si çé diféren).

   2. Tit a tô louvraj.

   3. Lanné li té komplété.

   4. Tay/dimensyon a tô louvraj dan pous (ps) o sentimèt (sm)—Otè x Lajè x Profondè (OxLxP).

   5. Nom-la a tô komminité langaj kréyol.
      
      Ègzemp: Nom. Tit. Matoriyèl. Dimensyon. Lanné. [Komminité langaj kréyol]
      

4. Ké to té pa sèrví lintèlijens pa vré (LPV, AI) pou fé tô louvraj.

Sivouplé, voyé nouzòt vô soumisyon é vô pòrtré moun kout (maksimonm 100 paròl/mo, ekrí dan trwazyinm pèsonn) dan in lamalèk avèk sijé “Fifolé 2026” koté ladrès-çila: feuxfolletslafayette@gmail.com

Dat limit: 15 sèptenm 2026