Tinnisi é alibamon: Nouvo map élèktoral
Nouvo map élèktoral aprouvé dan léta TINNISI
In lasmènn apré désizyon a Lakour Siprèmm, répiblikin, y’ap grouyé pou shanjé dê map élèktoral tou partou dan disid. Dan Tinnisi, sénatèz Marsha Blackburn té introdwi in nouvo map pou divizé lavòt démokrat a Memphis, in lavil ki çé aproshan 62.9% nwa dapré U.S Census Bureau. Nouvo map-çila té bordé dê kritik a memb démokrat-yé dan législatir Tinnisi. Parmi yé, Rèp. Justin Jones ki sòrti lasal tandi li t’ap brilé in drapo konfédéré. Malgré tou kritik é minm in protèstasyon ki té fòrmé endéyòr lasal, législatir répiblikin-la té majoritèmen voté pou nouvo map-çila ki alé divizé lavòt démokrat.
Alibamon: Répiblikin olé sèrvi in map bloké par in lakour fédéral
Répiblikin o Zalibamon té voyé in demand a Lakour Siprèmm pou kité léta sèrvi map élèktoral, ki in lakour fédéral en 2023 té bloké paske li té pa akòrdé avèk Voting Rights act a 1965. Léta Alibamon dispit ke yê ka çé pratikmen kom çila a Lalwizyan éyou Lakour Siprèmm té voté pou map élèktoral-la pendan prosé Lalwizyan v. Callais. Map propozé-la t’alé rédwi dê disrik minorité majoritè a ènn inik disrik dan lwès Léta.
