Ènn lidentité séré: balans ent ki vou yê é komen yé konsidèr vou
Mo pens James Baldwin té di li pli myé, “Laplas dan ki m’alé adonné va pa ègzisté jiska mo fé li.” Entan piti d’ènn mær alman é d’in pær afro-mérikin, fraz-çála rézonn profondémen ak mwin. Ça trap jonglmen-la mo té dévlopé apré mô lidentité--p’ap shèrshé pou in lèspas ki va aksèpté mwin mé fòrmé ènn ki senti otentik. Ça minn réfizé lésé dòt définé ki mo yê ou komen mo sé identifiyé. Enrivansh, ça konsèrn rèsté fidèl ak mo-minm, ap rékonné ke shak laventir çé diféren.
Ékan mo jwènn nouvo moun, yé koutim mandé dé kèstyon. Prémyé-la, “Ça to yê?” – dabitchid çé in manyè mandé apré mô nasyon. Apré mo répònn, swivan-la çé, “Ak ki bòr to identifi plis?” Enho sirfas-la, yé paré dê kèstyon inosen. Mé pou mwin, yé mèn dê zasompsyon é lèkspèktasyon ki té prenn tem rékonné é réfléshi.
Mô mær té konné di mwin pou répònn “limin” kan yé mandé ça mo yê. Çé té malin é kèkfwa ça mérité in ri, mé çé té rarmen lafin a konvèrsasyon-la. Mo té toujou senti prèsyon monté pou konté in vré répons. Épi kan mo fé ça, ça té fou difé a kèstyon intèrn ki mo té pòkò konné résoud. Eske mo gin pou shwazi? Ça ki ça minn shwazi? M’ap trayi in parti a mwin si mo vo-myé in parti pasé lòt? Ki dòt moun alé pensé apré mô shwa?
Apé apren listwa, tensyon té filé é kèstyon-yé vini pli fòr. Komen mo ka asosyé ak in koté ki té fé sitan ditòr atravèr moun-la? Épi en minm tem, komen mo pa ka senti in lempati profonn pou bòr-la ki té maltrété é ki té sufri atravèr listwa? Ça ki té komensé kom in kirosité simp a zòt ki vini kishòj pli kompliké en mwin--fidélité, koupabilité, lafyèrté, pa dignité, é lembrouy, tou d’in kou.
Apré kèk tem, kèstyon-çálayé té pa disparèt, mé yé té vini fasil pou tchinbo. Jòrdi, mo si fyè dèt almen ke mo afro-mérikin. Ènn dan zafèr mo admir plis apré lakiltir almen çé sô fransiz--na pa boukou sugarcoating. Moun bòr koté-çála souven minn ça yé di é di ça yé minn. Mo aprésèy lèspri é rézilyens a Afro-mérikin é dòt moun nwa dan djaspora. Dan tou in long listwa a loprèsyon, ina in lafòrs pèrsisten, kréativité, é réfizé lashé patat-la. Mo wa li dan manyè mô famiy renkont dê défi ak pèrsistens, limòr, é lèksprèsyon plito ké défèt. Çiyé pa dê karaktéristik abstré pou mwin – yé çé dê mòdèl mo té grandi vèk é té séyé pòrté dan mokènn lavi.
Par lir pèrspèktiv diféren sir lidentité, apé jonglé apré mokin lèkspiryans, é èksaminé lèkspèkasyon é linflwens otour mwin, mo rivé kompren ké lidentité çé pa kishòj mo gin pou rédwi pou renn li pli fasil pou lézòt kompren. Bézon-la pou konèksyon çé réel, mé ça pa bézon mwin pou séparé mo-minm. Mô lidentité çé pa in shwa ent dé koté; çé in lèspas ayou yé tou lê dé ègzist en minm tem. Mo pa gin pou shwazi-- é si mo jamé fé ça, shwazi-çála yenk mokin. Pli impòrtan, mo té apren ké lidentité konsèrn pa dékouvri ayou mo adonn, mé ça konsèrn kouraj-la pou kréyé plas-çála pou mo-minm.
Natascha Froehlich
Natascha Froehlich, éné en lalmañ, travay kom parajiris avèk Legal Aid Services of Oklahoma. Moman a dé piti fiy, li dédyé pou donné dê sèrvis légal ékitab atravèr frontiyè sosyo-ékonomik. Li linm lar, lamizik, litérachir, é li trouv in ta linspirasyon apré pèrsonnaj impòrtan kom Toni Morrison é James Baldwin
