In Gran Parti Listwa Lalwizyan Fransé ké pa dan Lalwizyan?
Afrikin-yé redwi en èsklavaj épi méné dan Lalwizyan dan komensmen 18èmm syèk. Yé té devyinn group étni konm Fon, Bamana, Wolof, Fulani, Kongo, Mina, Igbo é plis. Moun-çayé té kontribyé bokou a lakilchi kréyol lalwizyan paské nô manj ké nou manj, paròl-yé nou di é koutimm-yé nou fé çé akòz yé. Mé landrwa-la ké in ta de moun-çila té rivé çé pa dan Lalwizyan ojordi.
Premyé kolon-layé té rivé a Vyé Bilòksé a 1699 ki çé Ocean Springs, Méshasébé ojordi. 1702 yé kité pou fondé Mobil (Alibamon) ki té premyé kapital de Lalwizyan Fransé. En 1720 yé fé (Nouvo) Bilòksé kapital-la. In nan avan a 1719 premyé Afrikin-layé té rivé a Bilòksé épi yê rivé té marké debi dê shanjmen ki sé fé nô lakilchi ki li yê ojordi.
Pou komémoré yê rivé NAACP-la té lévé in markèr di Pasaj di Milyé ak 2 koté a laplaj Bilòksé é li di in listwa de ki té vini é kan. Markèr-la çé byin importan pou moun ki rès dan Lakòt di Golf di Méshasébé é en partikilyèr kominoté kréyol méshasébé paské listwa-çila çe pa byin ensenyé a nouzòt. Kominoté kréyol-la çé for mé li osi byin asimilé. Ina dê moun ki désendan kréyol mé pa identifyé ak yé ki pens léta Lalwizyan konm plas komplètmen diféren mé en réalité frontyèr-la pa gin aryin pou fé ak nou moun kréyol. Çé minm zafè pou moun ki rès dan Lalwizyan paské lê dé koté gin pou komprenn nou minm moun ki partaj listwa. Si to shèsh tô famiy pètèt t'alé trouvé in konèksyon a Bilòksé. Listwa é sitwasyon akswèl ak kominoté kréyol lakot méshasébé sa ekspliké dan in lartik a lavni.
Markèr-la sityé a lòt koté Far Bilòksé a stasyonmen shar a laplaj-la.
1050 Beach Blvd, Biloxi, MS 39530
Lyin plas latwal:
Daniele Simpson
Daniele Simpson çé in kréyol ki sòr lakòt Méshasébé é réziden a Gulfport, MS. Li çé in vétéran é té travayé dan léròspas é çé in kontraktò indépenden pou Ancestry.com ki trouv sô lintéré dan prézèrvasyon lakiltir kréyol, listwa, tambou afrikin, Kapoéra, é dèt poliglòt.
